പുയ്യാപ്ല മട്ടന്‍ ബിരിയാണി
-----------------------
കോഴി ബിരിയാണിയും കോഴിക്കോട്ടുകാരും തമ്മിലുള്ള ആത്മബന്ധത്തെക്കുറിച്ച് എല്ലാവര്‍ക്കുമറിയാം. കഴിച്ചുമടുത്ത സാദാ ബിരിയാണിയല്ല വ്യത്യസ്തമായ പലതരം ബിരിയാണികളാണ് എരഞ്ഞിപ്പാലം ജങ്ഷനിലെ കറിഹൗസ് റസ്‌റ്റോറന്റില്‍ നടക്കുന്ന ബിരിയാണി ഭക്ഷ്യമേളയില്‍ വിളമ്പുന്നത്. പുയ്യാപ്ല മട്ടന്‍ ബിരിയാണി, കോഴിക്കോടന്‍ കോഴി ബിരിയാണി, തലശ്ശേരി ആവോലി ബിരിയാണി, ചെട്ടിനാട് ചിക്കന്‍ ബിരിയാണി, നവാബി ചിക്കന്‍ ബിരിയാണി... മേളയില്‍ വൈവിധ്യങ്ങളേറെ. ബിരിയാണി മാസ്റ്റര്‍മാരായ നവാസിനും ശ്രീകുമാറിനുമാണ് പാാചകത്തിന്റെ ചുമതല. എന്നും ഉച്ചയ്ക്ക് 12 മണിമുതല്‍ ആരംഭിക്കുന്ന മേള ഞായറാഴ്ച സമാപിക്കും.

ചേരുവകള്‍
1. ബിരിയാണി അരി- ഒരു കിലോ
2. കറുവപട്ട- നാല് കഷ്ണം
3. കിസ്മിസ്- രണ്ട് വലിയ സ്പൂണ്‍
4. അണ്ടിപ്പരിപ്പ്- രണ്ട് രണ്ട് വലിയ സ്പൂണ്‍
5. നെയ്യ്- 250 ഗ്രാം
6. സവാള അരിഞ്ഞത്- 250 ഗ്രാം
7. മട്ടന്‍- ഒരു കിലോ
8. പച്ചമുളക്- 15
9. ഇഞ്ചി ചതച്ചത്- രണ്ട് വലിയ സ്പൂണ്‍
10. വെളുത്തുള്ളി ചതച്ചത്- രണ്ട് വലിയ സ്പൂണ്‍
11. ചെറുനാരങ്ങാനീര്- രണ്ട് വലിയ സ്പൂണ്‍
12. മല്ലിയില, പുതിനയില- രണ്ട് വലിയ സ്പൂണ്‍ വീതം
13. മല്ലി അരച്ചത്- രണ്ട് വലിയ സ്പൂണ്‍
14. കസ്‌കസ്- രണ്ട് രണ്ട് വലിയ സ്പൂണ്‍
15. തൈര്- ഒരു കപ്പ്
16. ഏലയ്ക്ക, ജാതിപത്രി, സാജീരകം, ഗ്രാമ്പൂ എന്നിവ പൊടിച്ചത്- രണ്ട് ടീസ്പൂണ്‍
17. ഉപ്പ്- പാകത്തിന്

പാകം ചെയ്യുന്ന വിധം
ഒരു പാത്രത്തില്‍ ബിരിയാണി അരിയും ആവശ്യത്തിന് വെള്ളവും ഉപ്പും കറുവപ്പട്ടയുമിട്ട് തിളയ്ക്കുമ്പോള്‍ പകുതി വേവില്‍ വാര്‍ത്തെടുക്കുക. കിസ്മിസ്, അണ്ടിപ്പരിപ്പ്, സവാള അരിഞ്ഞതില്‍ പകുതി എന്നിവ നെയ്യില്‍ വറുത്തുകോരുക. അതേ നെയ്യില്‍ ബാക്കിയുള്ള സവാള വഴറ്റിയെടുക്കുക.
ഒരു പാത്രത്തില്‍ സവാള വഴറ്റിയെടുത്തത്, മട്ടന്‍, ഇഞ്ചി, വെളുത്തുളളി, നാരങ്ങനീര്, മല്ലിയില, പുതിനയില, തൈര്, പതിനാറാമത്തെ ചേരുവ പൊടിച്ചതില്‍ പകുതി, പാകത്തിന് ഉപ്പ് എന്നിവ നല്ലവണ്ണം യോജിപ്പിച്ച്‌വെക്കുക. ഇതിന് മീതെ മാറ്റിവച്ച ചോറ് നിരത്തുക. ഇതിന് മീതെ വറുത്തുകോരിയ സവാള, കിസ്മിസ്, അണ്ടിപ്പരിപ്പ് എന്നിവയും ബാക്കി ബിരിയാണി മസാലപ്പൊടിയും നിരത്തുക. സവാള ഊറ്റിക്കോരിയ നെയ്യ് ഇതിന് മേലെ ഒഴിക്കുക. ചെമ്പ് പാകത്തിലുള്ള അടപ്പു കൊണ്ട് മൂടി ആവി പുറത്തുപോകാതിരിക്കാന്‍ മാവ് കൊണ്ട് ഒട്ടിക്കുക. അടുപ്പില്‍ പതിനഞ്ചോളം ചിരട്ടയിട്ട് ബിരിയാണിച്ചെമ്പ് വച്ച് 20 മിനുട്ട് ദം ചെയ്യുക. പിന്നീട് ഈ കനലില്‍ ഒരു മണിക്കൂര്‍ നേരം വെക്കുക. ഇതിനുശേഷം ബിരിയാണി തുറന്ന് ഉപയോഗിക്കാം.

tastembi@gmail.com

കോക്ക്‌ടെയ്ല്‍ ചിക്കന്‍ ടിക്ക

ഓണക്കാലത്ത് ഓലനും കാളനും എരിശ്ശേരിയും പുളിശ്ശേരിയുമെല്ലാം കഴിച്ചുമടുത്ത കോഴിക്കോട്ടുകാരെ അല്പം നോണ്‍-വെജ് വെറൈറ്റികള്‍ ആസ്വദിക്കാന്‍ ക്ഷണിക്കുന്നു വൈ.എം.സി.എ. ക്രോസ് റോഡിലെ ഹോട്ടല്‍ മറീന റെസിഡന്‍സി. മറീനയിലെ സെവന്‍ സീസ് മള്‍ട്ടിക്യുസിന്‍ റെസ്‌റ്റോറന്റില്‍ 'വെക്കേഷന്‍ഫുഡ് കാര്‍ണിവല്‍' നടക്കുകയാണ്. സ്്‌മോക്ക്ഡ് ബീഫ്, ലബനീസ് ഗ്രില്‍ഡ് ചിക്കന്‍, ആറ്റമിക് സീഫുഡ് സലാഡ്, ഗുലാബി ഗോഷ്ത്, കോക്ക്‌ടെയ്ല്‍ ചിക്കന്‍ ടിക്ക തുടങ്ങിയ മറുനാടന്‍ വിഭവങ്ങള്‍ തൊട്ട് നമ്മുടെ വള്ളുവനാടന്‍ ചിക്കന്‍ കറി വരെ കാര്‍ണിവലില്‍ വിളമ്പുന്നു. അവധിക്കാലമായതിനാല്‍ ധാരാളം കുടുംബങ്ങള്‍ ഈ നോണ്‍-വെജ് ഭക്ഷ്യമേളയ്‌ക്കെത്തുന്നുണ്ടെന്ന് മറീന റെസിഡന്‍സി ജനറല്‍ മാനേജര്‍ സി.എച്ച്. ജംഷീര്‍ പറഞ്ഞു.

ചേരുവകള്‍
1. കോഴി- എല്ലില്ലാത്ത എട്ട് ഇടത്തരം കഷ്ണങ്ങള്‍
2. മല്ലിപ്പൊടി- അര ടീസ്പൂണ്‍
3. മഞ്ഞള്‍പ്പൊടി- അര ടീസ്പൂണ്‍
4. കാശ്മീരി മുളകുപൊടി- അര ടീസ്പൂണ്‍
5. കറുത്ത കുരുമുളകുപൊടി- അര ടീസ്പൂണ്‍
6. ചിക്കന്‍ മസാല- അര ടീസ്പൂണ്‍
7. വെളിച്ചെണ്ണ- ഒരു ടേബിള്‍ സ്പൂണ്‍
8. കറിവേപ്പില- നാല് അല്ലി
9. വെളുത്തുള്ളി അരിഞ്ഞത്- 20 ഗ്രാം
10. വിനാഗിരി- ഒരു ടീസ്പൂണ്‍
11. അരിപ്പൊടി- ഒരു ടീസ്പൂണ്‍
12. ഉപ്പ്-ആവശ്യത്തിന്

പാകം ചെയ്യുന്ന വിധം
2 മുതല്‍ 12 വരെയുള്ള മസാലക്കൂട്ടുകള്‍ മുഴുവന്‍ കൂട്ടിച്ചേര്‍ത്ത് കോഴിയില്‍ പുരട്ടി 15 മിനുട്ട് വെക്കുക. അതിനുശേഷം ഇറച്ചിക്കഷ്ണങ്ങള്‍ തന്തൂരി കമ്പിയില്‍ കോര്‍ത്ത് തണ്ടൂരി അടുപ്പില്‍ 10 മിനുട്ട് വേവിച്ചെടുക്കുക. പുതിന ചട്‌നിക്കൊപ്പം ചുടോടെ വിളമ്പാം.

ചട്ടിപ്പത്തിരി (എരിവുള്ളത്)

നോമ്പുതുറയുടെ സ്ഥിരം വിഭവമായ ചട്ടിപ്പത്തിരി കഴിച്ചുമടുത്തവര്‍ക്കായി അതിലൊരു വെറൈറ്റി സമ്മാനിക്കുകയാണ് റിഷാദ്. മധുരമുള്ള ചട്ടിപ്പത്തിരിക്ക് പകരം ഇറച്ചിയും എരിവുമുള്ള ന്യൂജനറേഷന്‍ ചട്ടിപ്പത്തിരി പരീക്ഷിച്ചുനോക്കാന്‍ റിഷാദ് ക്ഷണിക്കുന്നു. പാലാഴി ഇരിങ്ങല്ലൂര്‍ സ്വദേശിയായ റിഷാദ് ജിംനേഷ്യം മാസ്റ്ററും സിനിമാറ്റിക് ഡാന്‍സറുമാണ്. പാചകം ഹോബിയാക്കിയ ഈ ചെറുപ്പക്കാരന്റെ മാസ്റ്റര്‍പീസ് ഐറ്റമാണ് എരിവുള്ള ചട്ടിപ്പത്തിരി.

ചേരുവകള്‍

1. ഇറച്ചി വേവിച്ചുപൊടിച്ചത്- ഒരു കപ്പ്
2. സവാള ചെറുതായി അരിഞ്ഞത്- 2 കപ്പ്
3. പച്ചമുളക്- ഒമ്പതെണ്ണം
4. ഇഞ്ചി- ചെറിയ കഷ്ണം
5. ഉപ്പ്- പാകത്തിന്
6. മുളകുപൊടി- കാല്‍ ടീസ്പൂണ്‍
7. മല്ലിപ്പൊടി- കാല്‍ ടീസ്പൂണ്‍
8. മഞ്ഞള്‍പ്പൊടി- കാല്‍ ടീസ്പൂണ്‍
9. കറിവേപ്പില,മല്ലിയില- ആവശ്യത്തിന്
10. ഗരംമസാല- ഒരു നുള്ള്
11. സസ്യഎണ്ണ-ആവശ്യത്തിന്
12. കോഴിമുട്ട- എട്ടെണ്ണ
13. കസ്‌കസ് വറുത്തത്- 2 ടേബിള്‍ സ്പൂണ്‍
14. തേങ്ങാപ്പാല്‍-കാല്‍ കപ്പ്
15. കിസ്മിസ്,അണ്ടിപ്പരിപ്പ്- ഒരു ടേബിള്‍ സ്പൂണ്‍
16. നെയ്യ്- രണ്ടു സ്പൂണ്‍
17. മൈദ- ഒരു വലിയ കപ്പ് (ഏഴു പത്തിരിക്കുള്ളത്)
18. ഏലക്കായ പൊടിച്ചത്- ഒരു ടീസ്പൂണ്‍

തയ്യാറാക്കുന്ന വിധം
ഒരു ഫ്രൈയിങ് പാന്‍ അടുപ്പില്‍വെച്ച് കുറച്ച് സസ്യഎണ്ണ ഒഴിച്ച് 2 മുതല്‍ പത്തുവരെയുള്ള ചേരുവകള്‍ വഴറ്റിയതിന് ശേഷം വേവിച്ച് പൊടിച്ച ഇറച്ചിയും ചേര്‍ത്ത് നന്നായി ഇളക്കി യോജിപ്പിച്ച് വെക്കുകക. നേരിയ ചൂടുവെള്ളത്തില്‍ ഒരു നുളള് ഉപ്പ് ചേര്‍ത്ത് പൊടി നന്നായി കുഴച്ച് ചെറിയ ഉരുളകളാക്കി മാറ്റിവെക്കുക. ഓരോ ഉരുളയും എടുത്ത് നേരിയതായി ഉണ്ടാക്കുന്ന പാത്രത്തിന്റെ വട്ടത്തില്‍ പരത്തിയതിന് ശേഷം ചെറുതായി ഒന്ന് ചുട്ടെടുക്കുക. ഒരു സ്പൂണ്‍ എണ്ണ ഒഴിച്ച് രണ്ട് കോഴിമുട്ട ഒരുനുള്ള് ഉപ്പ് ചേര്‍ത്ത് ചിക്കിയെടുക്കുക. ബാക്കി മുട്ടയും എലക്കായയും നാല് പച്ചമുളക് ചെറുതായി അരിഞ്ഞതും തേങ്ങാപ്പാലും കറിവേപ്പില നുറുക്കിയതും പാകത്തിന് ഉപ്പും ചേര്‍ത്ത് നന്നായി കലക്കിവെക്കുക. ഇറച്ചിക്കൂട്ടില്‍ കുറച്ച് കസ്‌കസും മുട്ട ചിക്കിയതും ചേര്‍ത്തിളക്കുക.
ഒരു പരന്ന കുഴിയുള്ള പാത്രമെടുത്ത് അതില്‍ കുറച്ച് എണ്ണ ഒഴിച്ചശേഷം മുട്ടക്കൂട്ട് എടുത്ത് അതില്‍ നാല് ടേബിള്‍സ്പൂണ്‍ എണ്ണയും ഒരു സ്പൂണ്‍ നെയ്യും ഒഴിച്ച് ഇളക്കിവെക്കുക. അതിനുശേഷം ബാക്കിയുളള ഓരോ പത്തിരിയും എടുത്ത് മുട്ടക്കൂട്ടില്‍ മുക്കി പാത്രത്തില്‍ നിരത്തുക. ഇടയില്‍ ഇറച്ചിക്കൂട്ട് നിരത്തുക. അങ്ങനെ മൂഴുവന്‍ പത്തിരിയും അട്ടിയായി നിരത്തുക. ആദ്യം വെക്കുന്ന പത്തിരിയില്‍ മുട്ടക്കൂട്ട് മുക്കരുത്. അടിവശം പെട്ടെന്ന് കരിഞ്ഞുപോകും.

Rishad

ബാക്കി വരുന്ന മുട്ടക്കൂട്ട് പത്തിരികളുടെ മുകളില്‍ ഒഴിച്ച് കൈകൊണ്ട് നന്നായി അമര്‍ത്തുക. എന്നിട്ട് അടച്ചുവെച്ച് നേരിയ തീയില്‍ നന്നായി വേവിച്ചെടുക്കുക. വേവുന്നതിന് മുമ്പ് മുകളില്‍ അണ്ടിപ്പരിപ്പും കിസ്മിസും കസ്‌കസും വിതറുക. ഒരു സ്പൂണ്‍ നെയ്യ് ചുറ്റും ഒഴിച്ചുകൊടുക്കുക. നന്നായി വെന്തെന്നുകണ്ടാല്‍ മറച്ചിട്ട് നേരിയ തീയില്‍ കുറച്ചുസമയം കൂടി അടുപ്പില്‍ വെക്കുക. ചട്ടിപ്പത്തിരി തയ്യാര്‍.

tastembi@gmail.com

judwa mushroom

ജുഡ്‌വ മഷ്‌റൂം

കോഴി ബിരിയാണിയുടെ ആസ്ഥാനമായ കോഴിക്കോട്ടെത്തിയാല്‍ ശരിക്കും വലയുക സസ്യാഹാരികളാകും. എണ്ണം പറഞ്ഞ നോണ്‍ വെജ്-റസ്‌റ്റോറന്റുകള്‍ ഇഷ്ടം പോലെയുണ്ടെങ്കിലും വെജിറ്റേറിയന്‍ ഭക്ഷണശാലകള്‍ ഏറെയൊന്നുമില്ല നഗരത്തില്‍. ഉള്ളവയാകട്ടെ മസാലദോശ-നെയ്‌റോസ്റ്റ്-ഊത്തപ്പം എന്നീ പഴഞ്ചന്‍ മെനു പിന്തുടരുന്നവയും. പുതുമ ആഗ്രഹിക്കുന്ന വെജിറ്റേറിയന്‍സിനായി രുചിവൈവിധ്യത്തിന്റെ കലവറ തുറക്കുകയാണ് പഞ്ചാബ് ഡി രസോയി. പട്ടുതെരുവില്‍ സെന്റ് ജോസഫ്‌സ് ബോയ്‌സ് ഹൈസ്‌കൂളിന് സമീപത്തായി ആരംഭിച്ചിട്ടുള്ള ഈ റസ്‌റ്റോറന്റില്‍ തനി പഞ്ചാബിശൈലിയിലുള്ള സസ്യാഹാരവിഭവങ്ങളാണ് വിളമ്പുന്നത്. വര്‍ഷങ്ങളായി കോഴിക്കോട്ട് താമസമാക്കിയ ഉത്തരേന്ത്യന്‍ വ്യവസായി ഭരത് ഭൂഷണ്‍ അഗര്‍വാളും സുഹൃത്ത് ഗേണഷും ചേര്‍ന്നാണ് റസ്‌റ്റോറന്റ് തുടങ്ങിയത്. നല്ല ഭക്ഷണം ആസ്വദിക്കാനിഷ്ടപ്പെടുന്ന കോഴിക്കോട്ടുകാര്‍ക്ക് പഞ്ചാബി ഭക്ഷണപ്പെരുമ പരിചയപ്പെടുത്തുക എന്നതാണ് പഞ്ചാബ് ഡി രസോയിലുടെ ലക്ഷ്യമെന്ന് ഭരത് ഭൂഷണിന്റെ മകനും റസ്‌റ്റോറന്റ് നടത്തിപ്പുകാരനുമായ കുശാല്‍ അഗര്‍വാള്‍ പറയുന്നു. ലുധിയാന സ്വദേശി ശീഷ്പദ് പന്‍വറാണ് റസ്‌റ്റോറന്റിലെ ചീഫ് ഷെഫ്. വിഭവങ്ങളുടെ തനത് രുചി ഉറപ്പുവരുത്താനായി പല ചേരുവകളും പഞ്ചാബില്‍ നിന്ന് കൊണ്ടുവരുകയാണെന്ന് ശീഷ്പദ് പറഞ്ഞു. ലസ്സി, പനീര്‍ ടിക്ക തിരംഗ, അമൃത്‌സരി മസാല പനീര്‍, ഭുട്ട പാലക്ക് മസാല, മിസ്സി റൊട്ടി, ചാട്ട്, പാവ്ഭാജി എന്നിവയൊക്കെ പഞ്ചാബ് ഡി രസോയിയിലെ ഹിറ്റ് വിഭവങ്ങളാണ്. ഉച്ചയ്ക്ക് നോര്‍ത്ത് ഇന്ത്യന്‍, സൗത്ത് ഇന്ത്യന്‍ താലി ഊണും രാവിലെ പൊങ്കലും ഇഡ്ഡലിയും വടയുമടങ്ങുന്ന ബുഫെ ബ്രേക്ക്ഫാസ്റ്റും റസ്‌റ്റോറന്റില്‍ വിളമ്പുന്നുണ്ട്.

ചേരുവകള്‍

1. കൂണ്‍- പത്തെണ്ണം
2. പുതിനയില- 15 ഗ്രാം
3. പച്ചച്ചീര- 15 ഗ്രാം
4. ചീസ്- 5 ഗ്രാം
5. കട്ടിത്തെര്- 20 ഗ്രാം
6. ക്രീം- 20 മില്ലി
7. ഇഞ്ചി-5 ഗ്രാം
8. നെയ്യ്- 5 ഗ്രാം
9. വെള്ളക്കുരുമുളകുപൊടി- ഒരു നുള്ള്
10. പച്ചമുളക് അരച്ചത്- 10 ഗ്രാം
11. ഗരംമസാല- എട്ട് ഗ്രാം
12. ബ്ലാക്ക് സാള്‍ട്ട്- അഞ്ച് ഗ്രാം
13. ജീരകം പൊടിച്ചത്- 10 ഗ്രാം

14. സവാള,കാപ്‌സിക്കം,തക്കാളി അരിഞ്ഞത്- 10 ഗ്രാം വീതം
15. ഉപ്പ്- ആവശ്യത്തിന്

തയ്യാറാക്കുന്ന വിധം

തണ്ട് മാറ്റിയ കൂണ്‍ ചൂടുവെള്ളത്തില്‍ കഴുകി അഞ്ചുമിനുട്ട് ആവിയില്‍ വേവിക്കുക. ചൂടുവെള്ളത്തില്‍ മുക്കിയ ചീരയും പുതിനയിലയും ഗ്രേറ്റ് ചെയ്ത ചീസും കൂടിച്ചേര്‍ത്തരച്ച് കുഴമ്പുരൂപത്തിലാക്കുക. കട്ടിത്തൈര്, ക്രീം, പച്ചമുളക് അരച്ചത്, ഗരംമസാല, ബ്ലാക്ക് സാള്‍ട്ട്, വെള്ളക്കുരുമുളക്‌പൊടി, ജീരകം പൊടിച്ചത്, നെയ്യ്, ഉപ്പ് എന്നിവ ചേര്‍ത്തുണ്ടാക്കിയ മിശ്രിതത്തില്‍ കൂണ് ചേര്‍ത്ത് പത്തുമിനുട്ട് വെക്കുക.  രണ്ട് കൂണുകള്‍ വീതമെടുത്ത് ഇടയില്‍  നേരത്തെയുണ്ടാക്കിവച്ച ചീര,പുതിനയില പേസ്റ്റ് നിറച്ച് കമ്പില്‍ കോര്‍ത്തെടുക്കുക. ഓരോ ജോഡി കൂണുകള്‍ക്കിടയിലൂം അരിഞ്ഞുവെച്ച ഉള്ളി, തക്കാളി, കാപ്‌സിക്കം എന്നിവയും കോര്‍ക്കാം. തുടര്‍ന്ന് തണ്ടൂര്‍ അടുപ്പില്‍ പത്തുമിനുട്ട് പാകം ചെയ്യുക. ഇവ ചൂടോടെ വെജിറ്റബിള്‍ സാലഡിനും പുതിന ചട്‌നിക്കുമൊപ്പം വിളമ്പാം.

tastembi@gmail.com

ഫിഷ് അല്‍ഫാം 

പ്രവാസി ജീവിതാനുഭവങ്ങള്‍ മലയാളിക്ക് സമ്മാനിച്ചത് അറബിക് ഭക്ഷണശൈലിയുടെ രുചിയൂറും വൈവിധ്യങ്ങളാണ്. കുബ്ബൂസും ഷവര്‍മയും ചിക്കന്‍ ഷവായയുമെല്ലാം നമ്മുടെ നാട്ടുകാര്‍ക്ക് പരിചിതമായത് ഗള്‍ഫ് വാസം കൊണ്ടുതന്നെ. കല്‍ക്കരിയടുപ്പിലെ കനലില്‍ ചുട്ടെടുക്കുന്ന അല്‍ഫാം വിഭവങ്ങളാണ് അറബിക് ഭക്ഷ്യപ്പെരുമയിലെ 'ഹോട്ട് ഫേവറിറ്റ്'. അല്‍ഫാം വിഭവങ്ങളുടെ തനതുരുചി ആസ്വദിക്കാന്‍ അവസരമൊരുക്കുകയാണ് വൈ.എം.സി.എ. ക്രോസ് റോഡിലെ ഹോട്ടല്‍ മറീന റെസിഡന്‍സി. േഹാട്ടലില്‍ അല്‍-ഫാം ഫുഡ് ഫെസ്റ്റിവല്‍ ആരംഭിച്ചത്. ഹോട്ടലില്‍ ആരംഭിച്ച അല്‍ഫാം ഫുഡ് ഫെസ്റ്റിവലില്‍ അറബിക്‌ശൈലിയില്‍ ചുട്ടെടുത്ത ചിക്കന്‍, ഫിഷ്, കാട വിഭവങ്ങളാണ് വിളമ്പുകയെന്ന് മറീന റെസിഡന്‍സി ജനറല്‍ മാനേജര്‍ സി.എച്ച്. ജംഷീര്‍ പറഞ്ഞു. എണ്ണയുടെയും കൊഴുപ്പിന്റെയും അംശം വളരെ കുറവായതിനാല്‍ ആരോഗ്യപ്രശ്‌നങ്ങളില്ലാതെ കഴിക്കാവുന്നതാണ് അല്‍ഫാം വിഭവങ്ങള്‍. ഒപ്പം കൂട്ടാന്‍ പൊറോട്ടയും മിന്റ് ചട്‌നിയും സാലഡുമുണ്ടാകും.


ചേരുവകള്‍

1. വലിയ മീന്‍ (തിരുത/ആവോലി/കരിമീന്‍)- 300 ഗ്രാം വരുന്ന ഒരെണ്ണം 
2. വെളുത്തുള്ളി- 30 ഗ്രാം
3. പച്ചമുളക്- രണ്ടെണ്ണം
4. തക്കാളി- ഒരെണ്ണം
5. സവാള- ഒരെണ്ണം
6. കാപ്‌സിക്കം-പകുതി
7. പുതിന ഇല- രണ്ടിതള്‍
8. തൈര്- അരക്കപ്പ്
9. മഞ്ഞള്‍പ്പൊടി- അരടീസ്പൂണ്‍
10. ഇഞ്ചി- 10 ഗ്രാം
11. കുരുമുളക് പൊടി- ഒരു ടീസ്പൂണ്‍
12. ചിക്കന്‍ മസാല- ഒരു ടീസ്പൂണ്‍
13. ഉലുവ ഇല- അര ടീസ്പൂണ്‍
14. ചാട്ട് മസാല- ഒരു ടീസ്പൂണ്‍
15. എണ്ണ- ഒരു ടീസ്പൂണ്‍
16. ചെറുനാരങ്ങ- ഒരെണ്ണം
17. ഉപ്പ്- പാകത്തിന്

പാകം ചെയ്യുന്ന വിധം

മീന്‍ അല്പം ഉപ്പും നാരങ്ങ നീരും ചേര്‍ത്ത് പുരട്ടിവെക്കുക. ഇഞ്ചി, വെളുത്തുള്ളി, പച്ചമുളക്, തക്കാളി, സവാള, കാപ്‌സിക്കം, പുതിന ഇല എന്നിവ ചേര്‍ത്ത് അരച്ചെടുക്കുക. ഈ അരപ്പിലേക്ക് അല്‍പം മഞ്ഞള്‍പ്പൊടി, കുരുമുളകുപൊടി, ചിക്കന്‍മസാല, ഉലുവ ഇല, ചാട്ട്മസാല, എണ്ണ, തൈര്, ഉപ്പ് എന്നിവ ചേര്‍ത്ത് നന്നായി ഇളക്കുക. ഇതിലേക്ക് മീന്‍ ഇട്ട് അരമണിക്കൂര്‍ നേരം വെക്കുക. പിന്നീട് ഈ മീന്‍ കമ്പിയില്‍ കോര്‍ത്ത് കത്തുന്ന കല്‍ക്കരിക്ക് മുകളില്‍ വെച്ച് ചുട്ടെടുക്കുക. നന്നായി വെന്തതിനുശേഷം ചാട്ട്മസാല വിതറിയ ശേഷം വിളമ്പുക. 

tastembi@gmail.com

ഡക്ക് കൊലവെറി

പരീക്ഷക്കാലത്തിനു മുന്നോടിയായി കുട്ടികള്‍ക്കൊരു ട്രീറ്റ് കൊടുക്കാന്‍ കോഴിക്കോട് വൈ.എം.സി.എ. ക്രോസ്‌റോഡിലെ ഹോട്ടല്‍ മറീന റെസിഡന്‍സി അവസരമൊരുക്കുന്നു.

മറീനയിലെ സെവന്‍ സീസ് മള്‍ട്ടിക്യുസിന്‍ റെസ്‌റ്റോറന്റില്‍ വെള്ളിയാഴ്ച മുതല്‍ 'കേരള ഫുഡ് ഫെസ്റ്റ്' ആരംഭിക്കുകയാണ്.

മൂന്നു നാള്‍ നീളുന്ന മേളയില്‍ വ്യത്യസ്തതയേറിയ നാടന്‍ വിഭവങ്ങള്‍ വിളമ്പുമെന്ന് ഹോട്ടല്‍ ജനറല്‍ മാനേജര്‍ സി.എച്ച്. ജംഷീര്‍ പറഞ്ഞു.

വഞ്ചിക്കാരന്‍ മുയല്‍, ഫിഷ് കാന്താരി ഗ്രില്‍, വയനാടന്‍ ഫിഷ്‌കറി, അമ്മച്ചി താറാവ് കറി, കാഞ്ഞങ്ങാട് കോഴി ബിരിയാണി, കടത്തനാടന്‍ താറാവ്, മീന്‍ കപ്പ പുഴുക്ക്, കപ്പ ബിരിയാണി, ചെമ്മീന്‍ അപ്പം തുടങ്ങി പേരില്‍ തന്നെ വെറൈറ്റി ആരംഭിക്കുന്ന ഭക്ഷണസമൃദ്ധിയാണ് ഇവിടെ അതിഥികളെ കാത്തിരിക്കുന്നത്.

ഉച്ചയ്ക്ക് 12 മുതല്‍ മൂന്ന് വരെയും രാത്രി ഏഴു മുതല്‍ 11 വരെയുമാണ് ഭക്ഷ്യമേളയുടെ സമയം. മേളയിലെ ഹിറ്റ് വിഭവമായ ഡക്ക് കൊലവെറിയുടെ പാചകക്കുറിപ്പ് ഇതോടൊപ്പം.

ചേരുവകള്‍

1. താറാവ്- നാലു കഷ്ണങ്ങള്‍

2. സവാള-രണ്ടെണ്ണം

3. തക്കാളി- ഒരെണ്ണം

4. പച്ചമുളക്-ഒരെണ്ണം

5. ഇഞ്ചി- 20 ഗ്രാം

6. വെളുത്തുള്ളി- 20 ഗ്രാം

7. കറിവേപ്പില- 10 ഗ്രാം

8. മല്ലിയില- 10 ഗ്രാം

9. ഉണക്കമുളക്- രണ്ടെണ്ണം

10. മുളകുപൊടി- ഒരു ടീസ്പൂണ്‍

11. മഞ്ഞള്‍പ്പൊടി- അര ടീസ്പൂണ്‍

12. മല്ലിപ്പൊടി- ഒന്നര ടീസ്പൂണ്‍

13. ചിക്കന്‍ മസാല- ഒരു ടീസ്പൂണ്‍

14. കുരുമുളകുപൊടി- അര ടീസ്പൂണ്‍

15. നെയ്യ്- ഒരു ടീസ്പൂണ്‍

16. വെളിച്ചെണ്ണ- 30 മില്ലി

17. തേങ്ങാപ്പാല്‍- 40 മില്ലി

18. ഉപ്പ്- ആവശ്യത്തിന്

തയ്യാറാക്കുന്ന വിധം

ചീനച്ചട്ടിയില്‍ വെളിച്ചെണ്ണ ഒഴിച്ചതിനുശേഷം ഉണക്കമുളകിടുക. അതിനുശേഷം അരിഞ്ഞുവച്ച ഇഞ്ചി, വെളുത്തുള്ളി, ഉള്ളി, പച്ചമുളക്, കറിവേപ്പില എന്നിവ ചട്ടിയിലേക്ക് വഴറ്റുക. ഉള്ളി നന്നായി വഴറ്റിയതിനുശേഷം അരിഞ്ഞുവെച്ച തക്കാളിയിടുക. അതിലേക്ക് ശേഷിച്ച മസാലകള്‍ ചേര്‍ക്കുക. അതിനുശേഷം വേവിച്ചുവെച്ച താറാവ് ഇതിലേക്ക് ചേര്‍ക്കുക. അല്‍പം വെളളം ചേര്‍ത്തതിനുശേഷം നന്നായി തിളപ്പിച്ചെടുക്കുക. അതിലേക്ക് കുറച്ചു നെയ്യും തേങ്ങാപ്പാലും ചേര്‍ത്ത് വറ്റിച്ചെടുക്കുക. ഇതിലേക്ക് മല്ലിയിലചേര്‍ത്ത് മാറ്റിവെക്കുക.

ഇറച്ചികായ ഉലര്‍ത്ത്

കോഴിക്കോട് നഗരത്തിലെ ഭക്ഷണപ്രിയരുടെ പുതുഡെസ്റ്റിനേഷനാണ് കറിഹൗസ് റസ്‌റ്റോറന്റ്. എരഞ്ഞിപ്പാലം കാരപ്പറമ്പ് റോഡില്‍ ആശീര്‍വാസ് ലോണ്‍സിന് തൊട്ടടുത്താണ് ഈ ഹോട്ടല്‍. മിതമായ വില, വൃത്തിയുള്ള അന്തരീക്ഷം എന്നിവയാണ് കറിഹൗസിനെ ശ്രദ്ധേയമാക്കുന്നത്. കോഴിക്കോട് നഗരത്തിലെ റെസ്‌റ്റോറന്റുകളില്‍ വച്ച് ഏറ്റവും കുറഞ്ഞ വിലയ്ക്ക് ബിരിയാണി വിളമ്പുന്നത് തങ്ങളാണെന്ന് കറിഹൗസ് മാനേജിങ് പാര്‍ട്ണര്‍ ബിനുജോര്‍ജ് അവകാശപ്പെടുന്നു. മറ്റിടങ്ങളില്‍ 110 രൂപ വരെ ഈടാക്കുന്ന കോഴിബിരിയാണിക്ക് കറിഹൗസില്‍ 90 രൂപയേ വിലയുള്ളൂ. കൃത്രിമ സുഗന്ധവസ്തുക്കളോ നിറങ്ങളോ ഒന്നും ചേര്‍ക്കാതെയുണ്ടാക്കുന്ന നാടന്‍ വിഭവങ്ങളും കറിഹൗസിലുണ്ട്. ചിക്കന്‍ തട്ടുകട, നാടന്‍ മട്ടന്‍കറി, ചമ്പക്കുളം മീന്‍കറി, താറാവുമുട്ട പൊടിമസാല, ബീഫ് കായ ഉലര്‍ത്ത് എന്നിവയാണ് പ്രധാന ഇനങ്ങള്‍. ഇവയ്‌ക്കൊപ്പം തലശ്ശേരി മീന്‍ബിരിയാണി, തലശ്ശേരി ദം ബിരിയാണി എന്നിവയും വിളമ്പുന്നുണ്ട്. ബീഫ് കായ ഉലര്‍ത്ത് തയ്യാറാക്കുന്ന വിധം:

ചേരുവകള്‍

1. ബീഫ് ഒരു കിലോ (ചെറിയ കഷ്ണങ്ങളാക്കിയത്

2. പച്ചക്കായ 200 ഗ്രാം

3. സവാള 250 ഗ്രാം

4. പച്ചമുളക് അഞ്ചെണ്ണം

5. ഇഞ്ചി 25 ഗ്രാം

6. വെളുത്തുള്ളി 25 ഗ്രാം

7. കറിവേപ്പില നാലു തണ്ട്

8. വെളിച്ചെണ്ണ 150 മില്ലി

9. മുളകുപൊടി രണ്ട് ടേബിള്‍ സ്പൂണ്‍

10. മല്ലിപ്പൊടി ഒരു ടീസ്പൂണ്‍

11. മഞ്ഞള്‍പ്പൊടി അര ടീസ്പൂണ്‍

12. ഇറച്ചിമസാല ഒരു ടേബിള്‍ സ്പൂണ്‍

13. പെരുംജീരകപ്പൊടി ഒരു ടീസ്പൂണ്‍

14. കുരുമുളകുപൊടി അര ടീസ്പൂണ്‍

15. ഉപ്പ് പാകത്തിന്

പാകം ചെയ്യുന്ന വിധം

ഒരു പാത്രത്തില്‍ എണ്ണ ചൂടാക്കി സവാള, പച്ചമുളക്, വെളുത്തുള്ളി, ഇഞ്ചി എന്നിവ യഥാക്രമം വഴറ്റുക. ഇതിലേക്ക് മുളകുപൊടി, മല്ലിപ്പൊടി, മഞ്ഞള്‍പ്പൊടി, ഇറച്ചിമസാല, പെരുംജീരകപ്പൊടി, ഉപ്പ് എന്നിവ ചേര്‍ത്ത് വീണ്ടും വഴറ്റിയശേഷം ഇറച്ചിയും ആവശ്യത്തിന് വെള്ളവും ചേര്‍ത്ത് വേവിക്കുക. ഇറച്ചി വെന്തുവരുമ്പോള്‍ അരിഞ്ഞുവെച്ച പച്ചക്കായ, കുരുമുളകുപൊടി, കറിവേപ്പില എന്നിവ ചേര്‍ത്ത് നന്നായി ഉലര്‍ത്തിയശേഷം ഉപയോഗിക്കാം.